Inwaragawag ti Department of the Interior and Local Government (DILG) ti posibilidad a maipawil amin a klase ti online video games a naglaon iti kinaranggas.
Sigun kenni DILG Secretary Jonvic Remulla, kasapulan nga adalen ti Kongreso ken maseknan nga ahensya ti gobyerno ti gakat a ‘total ban’ kadagiti bayolente nga online games, para iti proteksyon dagiti agtutubo a Pilipino.
Kasaruno daytoy dagiti report a maysa kadagiti suspek iti pammaltog idiay San Jose National High School idiay Tacloban ti nahilig nga agay-ayam iti maysa a bayolente nga online game a “GoreBox”.
Sigun iti Cybercrime Investigation and Coordinating Center (CICC), ti Gorebox ket maysa nga ayayam a mangpalpalubos kadagiti users daytoy nga agexperiment aramat dagiti armas ken paltog.
Temporaryo a hinarang ti CICC ti access iti nasao nga ayayam iti pagilian a Pilipinas bayat a mannarimaam pay laeng ti imbestigasyon seknan iti nasao a pasamak.
Innayon met ni Secretary Remulla a mabalin nga adda ti epektona kadagiti ubbing ti paulit ulit nga exposure dagitoy kadagiti online contents a naglaon iti kinaranggas. //bombokaren.c.sapirao
