Kinumpirmar ni Senate President Pro Tempore Win Gatchalian a kasapulan ti 16 a botos manipud iti senado tapno maconvict ni Vice President Sara Duterte iti umadani nga impeachment trial daytoy.
Sigun kenni Gatchalian, nakalanad idiay Article XI, Section 3(6) ti 1987 Constitution, saan a mabalin a maconvict ti maysa nga opisyal iti impeachment proceedings nu saan nga umanamong iti 2/3 ti amin a miyembro ti senado.
“Article XI, Section 3(6) of the 1987 Constitution states unequivocally that no person shall be convicted without the concurrence of two-thirds of all the Members of the Senate,” sigun kenni Gatchalian.
Inlawlawagna a gapu ta 24 ti pakabuklan a bilang dagiti senador, agtalinaed a 16 a botos ti kasapulan tapno maconvict ti bise-presidente.
“With the Senate’s membership fixed at 24, the conviction threshold is 16 votes, and it will remain 16 votes regardless of how many senators attend the trial, which bloc controls the chamber, or who presides over the impeachment court,” innayon daytoy.
Iti agdama, bukbuklen ti 12 a senador ti grupo ni Gatchalian bayat a 10 met a senador ti adda iti grupo ni Senator Alan Peter Cayetano no saan nga ibilang da Senator Jinggoy Estrada ken Senator Ronald “Bato” dela Rosa.
Mainaig iti dayta, naituding ti pre-trial conference ti impeachment kontra kenni VP Sara Duterte inton Hunyo 18. Naituding met ti trial proper inton Hulyo 6 iti agdama a tawen.
Kas Acting Senate President, impetteng ni Senator Gatchalian nga idauloanna ti panagdengeg ti impeachment case kontra iti bise presidente. //bombokaren.c.sapirao
