Nakasaganan dagiti aktibidad para iti umadanin a panakarambak ti 17th Hotel and Restaurant Tourism Weekend.
Iti panakiuman ti Bombo Radyo kenni Andrew Pinero,ti Public Information Officer iti Hotel and Restaurant Association Baguio(HRAB), maiyuswat ti centerpiece daytoy iti atrium ti kadaklan a mall iti siudad inton October 3.
Maifeature ti pakabuklan a sangapulo ket innem(16) a klase ti kinirog nga innapoy nga isagana dagiti walo(8) nga establishimento.
Sigun kenni Pinero, nabilin dagiti mangaramid kadagiti nagduduma a klase ti kinirog nga innapoy nga agaramat iti tallo ket kagudwa wenno uppat a kaban ti bagas nu sadino, mabalin a makapagpataud daytoy iti 12,000 agingga 13,000 a servings para kadagiti makidar-ay.
Manamnama nga agtalinaed ti “Taste of Cordillera” kadagiti daduma a barayti ti kinirog nga innapoy kas iti Kini-ing Rice, kasta met dagiti daduma pay a klase ti traditional fried rice.
Ti napagnunumwan a centerpiece iti 17th Hotel and Restaurant Tourism Weekend ket paset ti panangbigbig ti nasao nga organisasyon kadagiti mannalon nga isu ti mangimulmula iti pagay.
Kabayatanna,innayon ni Pinero a panggep ti maipatungpal nga Hotel and Restaurant Tourism Weekend nga itandudo ti siudad iti Baguio saan laeng kas tourist destination nu di ket kas culinary destination metlaeng.//BomboRob Dominguez
