Mapukpukaw ti 16 nga indibidual karaman ti 12 a foreign national kalpasan a limned ti bangka a naglugananda iti baybay a paset ti Red Sea idiay Egypt, sigun iti lokal a gobierno sadiay idi Lunes.
Naglaon daytoy ti 44 pakairamanan ti 31 a turista ken 13 a crew iti “multi-day diving trip” idi kellaat a nalned iti Marsa Alam.
Dumanon iti 28 nga indibidual ti naispal ken nagsagrap laeng ti minor injuries a kas ti pannakasugat a saanen a kasapulan a maiturong iti ospital.
Sigun kenni Red Sea Governor Amr Hanafi, posible a dakkel a dalluyon ti rason iti pannakalned ti bangka kas maibasar iti inisial a report dagiti otoridad.
Dagiti ganggannaet a nasional a naglugan iti 34-metro ti kaatiddogna a barko a kukua ti maysa nga Egyptian national, ket karaman dagiti Americans, Belgians, British, Chinese, Finns, Germans, Irish, Poles, Slovakians, Spanish, ken Swiss.
Makikikoordinar metten ti Hanafi iti nagduduma nga embahada, konsulado ken maseknan nga otoridad tapno mapasayaat ti dokumentasion para kadagiti naispal a pasahero, nga agdama a naiturong iti maysa nga hotel idiay Marsa Alam, ken tapno maipasigurado a maipaay ti kasapulanda.
Ti Red Sea ket nalatak a “diving destination” gapu iti nagkakapintas a “coral reefs” ken “marine life.”
