BAGUIO CITY – Naduktalan ti panaglabsing iti minimum health standards kontra iti COVID-19 ti dumanon 160 a business establishments ditoy Baguio City.
Malaksid iti daytoy, kinuna ni Executive Assistant V Engr. Philip Puzon Jr. ti City Mayor’s Office a 51 nga establishimento ti temporaryo a naiparikep gapu iti ado a panaglabsing dagitoy kadagiti pagalagadan nga intuding ti lokal a gobyerno.
Dinakamatna a dagiti nasao a bilang ket manipud iti pakabuklan a 6,141 a business establishments ditoy siudad a sinukimat ti City Permits and Liscensing Division iti uneg ti lima a bulan.
Sigun pay kenkuana, manipud idi Enero agingga Mayo 25, 2021 ket dumanon iti 1,037 a business establishiments ti naipasardeng ti operasyonda ken nangisubli iti business permits-da gapu iti epekto ti COVID-19 pandemic.
Kabayatanna, dumanon met iti 15,446 a baro a business permits ti naipaay kadagiti sumagmamano nga establishimento iti siudad a nakakolektaran ti nasurok P166-M.
