BAGUIO CITY – Nalaos ti ragsak ti maysa nga BS-Psychology student kalpasan a nagun-odna ti bronze medal iti Taipei City Cup Taekwondo International a naipatungpal idiay Taiwan.
Sigun kenni Creishna Kate Gayudan, a tubo ti Ucab, Itogon, Benguet, daytoy ti umuna a gundaway a nakipartisipar isuna iti ballasiw-taaw ken saanna a ninamnama a maka-podium finish isuna iti 49kgs division.
Ipanamnama pay ti 19-anyos a Taekwondo jin a dakkel a karit kenkuana ti preparasyon daytoy a pasalip kas iti umno a time management gapu ta pag-gidgiddanenna ti panagadalna ken ti panagbalinna kas atleta.
Sigun met kenni Nicky Dominic Belo, ti nagserbi kas coach ni Gayudan, dakkel a karit kadakuada ti preparasyon sakbay iti laban agsipud ta bassit laeng a panawen ti naipaay kadakuada iti panag-ensayo ken training para iti Taekwondo event.
Iti agdama, nakaipamaysa ti atensyon ni Belo nga implementar ti insaganana a programa iti Taekwondo tapno mapasayaat pay ti skills ken performance dagiti atleta kalpasan ti panagsubli iti pagilyan manipud iti Korea.//Rosemarie Bulsao
