BAGUIO CITY – Natiliw ti dua a drug personalities iti nagsina a buy-bust operation dagiti otoridad iti siudad ti Baguio ken sadiay La Trinidad, Benguet idi kalman.
Nakemmeg sadiay Upper Magsaysay Barangay ti high value drug personality a ni Josephine Landicho Catapang alyas Graysya, 47-anyos, balo, tubo ti Batangas ken residente ti Middle Quirino Hill, Baguio City.
Nakumpiskar kenkuana ti tallo a pekete ti maatap a shabu nga agdagsen ti 1.5 grams, pakairamanan ti inaramatna a cellphone ken ti buy-bust money.
Kabayatanna, nakemmeg metlaeng ti top 10 drug personality ti La Trinidad iti buy-bust operation sadiay.
Nabigbig daytoy a ni Steve Ocampo Lachica, 19-anyos, tattoo artist ken residente ti Banig, Tawang, La Trinidad, Benguet.
Nakumpiskar kenkuana ti walo a pakete ti maatap a shabu ken nagduduma a drug paraphernalia.
Nakumpikar pay manipud kenni Lachica ti maysa a caliber 38 revolver ken maysa a caliber 9mm.
Iti agdama, sumangsango da Lachica ken Catapang iti kaso a panaglabsing iti Comprehensive Dangerous Drugs Act of 2002 bayat a nainayon a naipila ti kaso nga illegal possesion of firearms kontra kenni Lachica.
