BAGUIO CITY – Awananen iti biag ti maysa a 2-anyos nga ubing a nasarakan a tumtumpaw iti Abra River sadiay Brgy. Poblacion West, Pidigan Abra idi kalman.
Nabigbig daytoy a ni Aeros Tadeo Sanchez, ken residente ti Sitio Ansad, Brgy. Pobacion West, Pidigan, Abra.
Maibasar iti imbestigasyon ti Pidigan Municipal Police Station, nagreport iti istasyonda ni Isabelo Advincula Sanchez ken inreport-na a mapukpukaw ti apo daytoy.
Kinunana a nakitana ti apona a magmagna a paturong iti kalapaw (kubo) ti kabsatna ken kalpasan ti sangapulo a minutos ket nagturong daytoy iti kalapaw tapnu sukonen ti apona ngem saanna daytoy a nasangpetan.
Dagusna a sinapol ti apona ngem saanna a nasarakan isut gapuna a nagreport daytoy iti istasyon ti pulisya.
Iti agarup lima nga oras a panagsapol dagitoy ket nasarakan laengen ti bangkay ti ubing a tumtumpaw iti karayan.
