BAGUIO CITY – Agpapaimbag ti dua a construction workers kalpasan a nakuryente dagitoy iti maikatlo a kadsaaran ti maysa a pasdek iti Public Market sadiay Poblacion, Bontoc, Mt. Province idi kalman.
Nabigbig dagitoy a da Cyrile Jr. Lacaben Fayno, 24, awanan iti asawa ken tubo ti Poblacion, Sadanga, Mountain Province, ken ni Danny Annam Cabab, 48, naasawaan ken residente ti Betwagan, Sadanga, Mountain Province.
Maibasar iti imbestigasyon ti pulisya, agtratrabaho dagiti biktima kas construction workers ni Rose Marie Chumapoy Hinatuan, 41, ken residente ti Omfeg, Bontoc Ili, Bontoc.
Naamuan a manarimaan ti panangiguyodda iti 16 mm steel bar nga aramatenda kas poste ti pasdek idi naisagid daytoy iti maysa kadagiti high tension wire ti Mountain Province Electric Cooperative.
Gapu iti daytoy, nagsagrap dagiti biktima iti electrical burns.
Na-confine ni Fayno iti Bontoc General Hospital bayat a nai-refer iti Baguio General Hospital and Medical Center ni Cabab para iti kanayunan nga obserbasyon.
