BAGUIO CITY – Nakemmeg ti dua a high value individual a karaman iti unified list iti PROCOR ken PDEA Cordillera babaen iti naisayangkat a buy-bust operation sadiay Easter Road, Guisad Central, Baguio City idi kalman.
Nabigbig dagitoy a da REYNALDO NUDA CASTRO, 33-anyos, laborer, tubo ti Balagtas, Bulacan ken residente sadiay South Sanitary Camp, Baguio City ken CLINT AMBRUCIO MACHACHOR, 32-anyos, tubo ti Malate, Manila ken residente ti Upper Fairview, Baguio City.
Nakumpiskar manipud kadagitoy ti lima a pakete a naglaon iti crystalline substance wenno shabu nga agdagsen iti 50 grams ken mapattapatta nga aggatad iti P340,000.
Malaksid iti dayta, narekober pay manipud kadagiti suspek ti boodle money, cellphone ken dua a motorsiklo nga inaramatda iti transaction.
Naiturong dagiti dua iti kustudiya iti pulisya bayat a maisagsagana ti kaso a maipila kontra kadakuada.
