BAGUIO CITY – Nakemmeg ti dua nga indibidual iti buy-bust operation nga insayangkat dagiti otoridad iti maysa a parking lot sadiay Yap Street, South Sanitary Camp, Baguio City idi kalman.
Nabigbig dagitoy a da Noemy Lupadit, 30-anyos, balasang, awanan trabaho, residente ti Upper Ambiong, La Trinidad, Benguet ken ni Crisanto Kiblasan, 24-anyos, mannalon, tubo iti Sadsadan, Bauko, Mt. Province ken residente iti Sanitary Camp, Baguio City.
Nakumpiskar manipod kadagitoy ti 5 a pakete a naglaon ti maatap a shabu, kwarta a naaramat iti transaksion, nagduduma a drug paraphernalia ken ti plaka ti lugan nga inaramat dagiti dua.
Insayangkat ti puwersa ti City Drug Enforcement Unit ti Baguio City PNP ken ti STATION 3 ti Baguio City PNP ti nasao nga operasyon.
Naipila metten ti kaso a panaglabsing iti Comprehensive Dangerous Drugs Act of 2002 kontra kadagiti dua nga indibidual. (-Bombo Nikki Agsiweng | Bombo Charles Nikko Limon)
