Nasayaat ti pannakaasikaso dagiti dua pulo a Pilipino a “seafarers” ti Norwegian-flagged bulk carrier MV Lunita a natiliw sadiay South Korea gapu iti panagawitda iti mapapati a cocaine bayat a manarimaan ti imbestigasion, sigun iti Department of Migrant Workers.
Kinuna ni Migrant Workers Undersecretary Felicitas Bay iti online briefing idi kalman a nasayaat ti salun-at dagiti Pilipino ken dagiti karbenganda, allotment ken dagiti tangdan, suplay ti taraon ken dadduma pay a kangrunaan a kasapulan dagitoy ket agtultuloy nga ipapaay ti agtagikua iti barko.
Kinuna pay ni Bay a nangipaay ti shipping agency ti maysa a Filipino interpreter, abogado ken maysa a pannakabagi ti Migrant Workers Office a nakapagbisita iti nasao a barko.
Mangipaay metlaeng ti nasao nga opisina ti collaborating counsel para kadagiti Pilipino.
Kinuna ni Migrant Workers Secretary Hans Leo Cacdac a nakalugan paylaeng dagiti Pilipino a seafarers iti nasao a barko.
