BAGUIO CITY – Malamlamayan ita ti maysa a mannalon kalpasan a binagsol ti padana a mannalon sadiay Manpey-as, Brgy. Bulalacao, Mankayan, Benguet idi kalman.
Nabigbig daytoy a ni Jerrel Mariano Gonogon, 20 -anyos, baro, tubo ti Mayoyao, Ifugao ken residente ti Caew, Bulalacao, Mankayan, Benguet.
Suspek met iti nasao nga insidente ni Rustom Mariano Balayya, alyas Kilip, 18 -anyos, baro, tubo ken residente metlaeng iti nasao a lugar.
Naduktalan iti inisyal nga imbestigasion ti Mankayan Municipal Police Station a naadaan iti nabara nga argumento ti suspek ken ti biktima kabayatan ti panaginomda iti arak.
Ditoy a kilaat a nangiruar iti kutsilyo ti suspek a pinagbagsolna iti biktima a nagresulta iti panagkadangran ti kanigid a paset ti barukong daytoy
Naitaray pay ti biktima ngem naideklara a pimmusay.
Nakemmeg met ti suspek iti insayangkat dagiti otoridad nga hot pursuit operation nga itan ket napilaan iti kaskenan a kaso.
