Puntiria ti opisina ti Commission on Elections (Comelec) Baguio a magun-od ti 2,000 voter registration sakbay ti deadline inton Agosto 10.
Maibasar iti datos sipud idi kalman, dumanon iti nasurok 1,500 nga indibidual ti nakarehistro bayat ti umuna a tallo nga aldaw, sgin kenni Atty. John Paul Martin.
Kaaduan a nagrehistro ket dagiti agtutubo, a manamnama a makipaset iti eleksion.
Maragsakan met ni Atty. Martin gapu iti dedikasion ken gagar a makipaset dagiti agtutubo iti umay nga eleksion.
Tapno nalaklaka nga agparehistro dagiti indibidual, inaldawda a mangimuntar dagiti mobile satellite registration centers iti dua a lokasion iti intero a siudad malaksid iti kangrunaan nga opisina ti Commission on Elections.
Karaman dagiti pagadalan, barangay hall, ken special events, kas iti caravan dagiti senior citizens.
Idi napalabas a lawas, naideploy ti mobile sites kadagiti lugar kas ti barangay Irisan, Quirino Hill, Baguio City National High School ken daddima pay.
Sipud idi Disiembre idi napalabas a tawen, nakailista ti siudad ti Baguio iti 166,416 registered voters ken addaan ti voter turnout a dumanon iti 79.40% bayat ti May elections.
Impalagip ni Martin iti publiko a saanda nga urayen ti last minute ken inlawlawagna a dagiti baro a voters ken dagiti mang-reactivate ti registration da ti maakomodar.
Saan a maipalubos ti panagyakar bayat ti nasao a perion malaksid no manipud kadagiti ballasiw-taaw nga absentee voters nga umakar a permanente.
