Sumangsango ita iti kaskenan a kaso ti 21-anyos a lalaki kalpasan a nakemmeg ken naalaan daytoy iti ₱926,475.60 a gatad ti napagango a marijuana, iti buy-bust operation nga insayangkat ti nagtipon a puersa ti Philippine Drug Enforcement Agency Cordillera (PDEA-CAR) ken Philippine National Police sadiay Barangay Shilan, La Trinidad, Benguet idi kalman.
Sigun iti PDEA-CAR, nakemmeg ti nasao a lalaki a tubo manipud Kibungan, Benguet kalpasan a naglako daytoy iti 7.72 kilos ti dried marijuana kadagiti undercover agents.
Nabungon dagitoy a kontrabando babaen iti brown packing tape iti walo nga elongated bundles.
Nakumpirmar met babaen iti laboratory examination a daytoy ket marijana a pakairamanan ti dried marijuana leaves, stalks, ken fruiting tops. Nakumpiskar met iti lalaki ti lugan a maatap nga ar-aramatenna iti iligal a transaksiyon.
Sumangsango ita daytoy iti kaso a panaglabsing iti Section 5, Article II ti Republic Act 9165, wenno Comprehensive Dangerous Drugs Act of 2002. | via Bombo Alfred Pudsoc
