Pimmusay ti agarup 22 bayat a nadangran ti agarup 36 nga Afghans kalpasan a nabaliktad ti naglugananda a truck iti main highway sadiay Laghman province, Afghanistan.
Sigun kenni Abdul Malik Niazai, spokesperson ti provincial governor, karaman kadagiti pimmusay ti 10 nga ubbing ken lima a babbae.
Manarimaan metten nga agpatpataming iti ospital dagiti nadangran.
Sigun iti provincial director ti public health a ni Aminullah Sharif, nabaliktad ti lugan kalpasan a nakaturog ti driver.
Dagiti pasahero ket karaman kadagiti rinnibu nga Afghans nga agsubli kuma idiay Afghanistan, kalpasan a napapanawda sadiay Pakistan.
Maipalagip a masansan ti traffic accidents iti intero nga Afghanistan gapu iti saan a nasayaat a pannakamitiner dagiti kalsada ken ti saan a panangikankano dagiti drivers iti pagannurotan ti trapiko.
