BAGUIO-Dumanon iti 248 a pamilya a benipisaryo ti Social Amelioration Program (SAP) sadiay Kapangan, Benguet ti nakaawat iti tulong pinansial dagitoy idi kalman.
Indauluan da DSWD Undersecretary Jose Ernesto Gaviola, DSWD-Cordillera Regional Director Leo Quintilla ken DILG-Cordillera Regional Director Marlo Iringan iti panangasistar ni Kapangan Mayor Many Fermin ti naangay a ceremonial distribution ti tulong pinansial kadagiti nasao a kanayonan a benipisaryo ti SAP.
Sigun kenni Dumlao, iti entero a pagilian ket ti ili ti Kapangan sadiay Benguet ti kaunaan a nakaawat iti kanayonan a tulong pinansial babaen iti SAP iti sidong ti Emergency Subsidy Program ti gobyerno.
Kinunana a maysa ti Kapangan kadagiti lokal a gobyerno nga immuna a nakaisumitir ti certified eligible beneficiaries iti DSWD-Cordillera ken daytoy ti kaunaan a lokal a gobyerno a naipasidong ken nakakompleto iti validation.
Inlawlawagna a karaman dagiti benipisaryo ti SAP sadiay Kapangan kadagiti immapela nga agbalinda a benipisaryo ti umuna a dupag ti tulong pinansial ngem iti baet a kwalipikadoda ket nainayonda iti ‘waitlisted’ ti DSWD.-
