Nangisayangkat ti panagsukimat ti Department of Agriculture-Cordillera iti pannakitinnulongda iti Bureau of Plant Industry (BPI) kadagiti 26 a talon idiay munisipio ti Atok, Kibungan, Bakun, ken Tublay, Benguet ken Barangay Pinsao iti siudad ti Baguio.
Ti inspeksion para iti Philippine Good Agriculture Practices (PhilGAP) certification ket naisayangkat itay laeng nabiit.
Idiay Benguet, dumanon iti 25 a talon ti agimulmula kadagiti nateng a kas ti patatas, cabbage, carrot, chinese cabbage, strawberries, sugar beets, beans, lemon, celery, bell pepper, tomato, spinach, parsley, ken lettuce, bayat a maysa a talon iti siudad ti Baguio ti agimulmula ti kape ken lemon.
Dagiti talo ket nai-valuate iti on-site ken naduktalan a “compliant” dagitoy iti standards ti Philippine Good Agriculture Practices, nangruna iti food safety, panangiprodyus ti kalidad, panangitandudo ti environmental management, ken maipasigurado iti salun-at, kinatalged, ken welfare dagiti mannalon.
Iti agdama, dumanon iti pakabuklan a 489 certified farms manipod iti probinsia ti Benguet ken sangapulo ket maysa ti nasertipikaran a talon iti siudad ti Baguio.
Dagitoy a talon ket namonitor bayat ti umuna a tawen ti panangipaay ti certification tapno maipasigurado nga agtultuloy ti panagtulnogda iti standard ti Philippine Good Agriculture Practices.
Manamnama a maipaulog ti certificates ita a bulan.
