BAGUIO CITY – Nakemmeg ti tallo a drug personalities sadiay Tabuk City, Kalinga bayat a nakumpiskar kakuada ti agarup P304,000 a gatad dagiti mapapati nga iligal a droga kalpasan a nagpositibo ti naiyemplementar a nagsina a search warrants kontra kadagitoy idi kalman gapu iti panaglabsingda iti RA 9165 wenno ti Comprehensive Dangerous Drugs Act of 2002.
Immuna a naimplementar ti search warrant iti balay ni Rufina Guimba Ayyang, 35-anyos, naasawaan, agtagibalay ken residente ti Lacnog, Tabuk City.
Nagresulta daytoy iti panakakemmegna ken iti panakakumpiskar ti maysa a botelya a naglaon ti mapapati a marijuana oil, maysa a botelya ti sodium ascorbate a naglaon ti mapapati a marijuana oil residue ken 12 a marijuana seedlings a naimula iti aglawlaw ti balay.
Simmaruno a naimplementar ti sabali pay a search warrant iti kapada a lugar ngem iti balay da Merlyn Guimba Cardenas, 36-anyos, agtagibalay, nakalista a high value individual (HVI) drug personality ti rehion Cordillera ken ni Kenneth Wanas Cardenas, 34-anyos, mannalon, nakalista a newly identified drug personality.
Nagresulta daytoy iti panakakemmegda ken iti panakakumpiskar ti 15 a botelya a naglaon ti mapapati a marijuana oil, 5 a pakete ti mapapati a shabu, gallon a naglaon ti dua a litro ti mapapati a marijuana oil, ken maysa a pakete ti mapapati a marijuana seeds nga agdagsen ti 250 a gramo.
Naamuan nga impaulog ni Presiding Judge Jerson Angog ti Regional Trial Court, 2nd Judicial Region, Branch 25, Bulanao, Tabuk City, Kalinga dagiti nasao a search warrants.
Iti agdama, sumangsango metten dagiti tallo a drug personalities iti kaso a panaglabsing iti Comprehensive Dangerous Drugs Act of 2002.
