BAGUIO CITY – Sumangsango iti nagtutuon a kaso ti tallo a lallaki manipud Cordillera a nang-agaw iti dua a motorsiklo ken nangrames iti dua a senior high school students a nobya dagiti dua a driver dagiti motorsiklo sadiay Diadi, Nueva Vizcaya.
Nakasuanen dagiti tallo a suspek iti robbery, motornapping ken rape.
Naamuan ti Bombo Radyo Cauayan kenni Police Captain Felix Mendoza, deputy chief of police ti Diadi Police Station sadiay Nueva Vizcaya nga adda ti testigo a nakakita kadagiti suspek a dimmar-ay iti maysa a kallaysa ken nabigbigna a nagtaud dagiti suspek kadagiti probinsia ti Ifugao ken Kalinga.
Nupay kasta, kiniddawna ti saan pay a panakaiwaragawag ti nagan dagiti tallo a suspek tapnu saan a maapektaran ti operasyonda tapnu makemmeg dagitoy.
Maibasar iti report, nagtaud dagiti biktima iti maysa a kallaysa ken paawiddan iti barangayda iti parbangon idi bimmangen kadakuada dagiti armado a lallaki.
Immuna nga inala dagiti suspek ti kwarta ken cellphone dagiti biktima ngem idi nakitada ti langa dagiti dua a babai a backriders ket inguyodda dagitoy iti ayan dagiti mula a mais ken sadiay a rinamesda dagitoy.
Awan ti naaramidan dagiti dua a baro gaputa napatuduan dagitoy iti paltog ken napangtaan ti biagda.
