BAGUIO CITY – Inlinteg ti Department of the Interior and Local Government (DILG) – Cordillera Regional Office ti immuna a reportda iti Central Office ti ahensia a nangkuna nga uppat a munisipyo iti Cordillera Region ti napaay a nagtungpal iti road clearing order ni Presidente Rodrigo Duterte.
Sigun kenni Engr. Marlo Iringan, Regional Director ti DILG-Cordillera, tallo laeng a munisipyo iti rehiyon ti saan a nakatungpal iti nasao a pammilin a pimmaut iti 60-days.
Kinunana a dagiti munisipyo ti Manabo ken Boliney sadiay Abra ken ti munisipyo ti Banaue sadiay Ifugao.
Inaklonna a nagbiddutda iti umuna a report nga uppat a munisipyo iti rehiyon ti non-compliant iti entero a rehiyon gaputa kalpasan ti re-validation iti maysa a munisipyo ti Benguet ket napaneknekan a nagtungpal daytoy iti pammilin isut gapuna a naikkat iti listaan.
Naituding a makaawat iti show cause orders dagiti mayor dagiti nasao a munisipyo tapnu agpalawagda no apay a napaayda a nagtungpal iti clearing order.
Innayonna a no saan a justifiable ti rason dagiti mayor dagiti non-compliant municipalities ket sumango dagitoy iti administrative charges kas iti dereliction of duty ken negligence.
