BAGUIO CITY – Naipaayan iti tallo a bulan a pawayway ti business sector ken dagiti vendors iti merkado publiko ti siudad ti Baguio para iti panangpa-ibus ken panangkonsumoda iti nabatbati nga stocks dagitoy a cellophane wenno plastic bags.
Iti panakaiyuman ti Bombo Radyo kenni General Services Office – Solid Waste Management Division Head Dominador Urbanozo, kinunana a daytoy ti napagnumuan dagiti stakeholders kabayatan ti panakabukel ti Implementing Rules and Regulations (IRR) ti Plastic and Styrofoam Free Baguio Ordinance.
Kinunana nga ur-urayenda met ti mabuangay ti task force a mangkita ken mangsukimat iti panakaimplementar ti nasao nga ordinansa.
Dinakamatna met a nupay nabiit wenno idi laeng May 1 a nag-epektibo ti ordinansa ket adun dagiti nagtungpal iti daytoy ken bassit laengen dagiti agar-aramat iti plastic bags wenno dagiti sando bags, nangruna iti Central Business District ken iti city market.
Sigun pay kenni Urbanozo, nailanad iti IRR a maipalubos met ti panaka-aramat dagiti sando bags a sinertipikaran ti Department of Science and Technology a biodegradable wenno marunrunot a kita ti plastik.
Innayonna nga iti wet market ket mismo a dagiti vendors ti mangdamag no adda ti intugot ti kustomer a bayong wenno pagkabilan iti gatangen daytoy a produkto nupay adda ti nakasagana nga eco bags nga ilako dagitoy.
Kabayatanna, dinakamat ni Urbanozo a ti puntirya ti Plastic and Styrofoam Free Baguio Ordinance ket ti panakakissay ti panagaramat ti cellophane wenno sando bag iti lokalidad.
Kinunana a daytoy ket gaputa saan a mabalin a mairesiklo dagiti cellophane ken dagitoy dagiti kadawyan ken kaaduan a makolkolektarda no agdalusda kadagiti kankanal, waig, sewerage ken dadduma pay a pagpagnaan ti danum.