BAGUIO CITY – Naiyusuaten ti PUV Modernization Program ditoy Cordillera babaen iti panakaiparang iti publiko dagiti baro ken moderno a jeep nga agbiahe iti sumagmamano a ruta iti Baguio City; Bokod, Benguet ken iti Bauko ken Tadian sadiay Mountain Province.
Sigun kenni Jude Wal, chairman ti Cordillera Basic Sectors Transport Cooperative nga agtagikua kadagiti nasao a lugan, bukbuklen dagitoy ti 30 nga yunit nga agbiahe iti ruta ti Baguio Plaza-Trancoville; Baguio Plaza-Aurora Hill; Poblacion, Bokod paturong iti Mount Pulag Ranger Station ken sadiay Mabaay, Bauko paturong iti MPSPC Tadian Campus sadiay Mountain Province.
Dinakamatna a ti panakairuar dagiti nasao a lugan ket paset ti implementasyon ti fleet dispatch system a binukel ti lokal a gobyerno ti Baguio, ti LTFRB ken ti kooperatibada a maitunos iti implementasyon ti PUV Modernization Program.
Impannakkelna pay nga amin dagiti nasao a moderno a jeep ket naipadas kadagiti nagduduma a klase ti kalsada ditoy siudad ken makalaon dagitoy iti 22 a pasahero.
Maibasar iti naipaay a fare matrix para iti moderno a jeep, P11 ti plete para iti umuna nga uppat a kilometro wenno iti short trip bayat a manayonan iti P1.50 agingga P1.80 iti tunggal sumaruno a kilometro.
Kagiddan ti aktibidad ket impaay ni LTFRB Chairman Atty. Martin Delgra III ti Provisional Authority para iti operasyon ti kooperatiba nga agpaut iti makatawen ken agpaso inton December 9, 2021.
