BAGUIO CITY – Nagturpos iti elementarya ken Junior High School dagiti tallo pulo ket dua a Persons Deprived of Liberty (PDL) wenno balud manipud Baguio City Jail Male and Female Dormitory babaen iti programa ti Bureau of Jail Management and Penology ken ti Department of Education.
Manipud iti nasao a bilang, siyam a balud ti nagturpos iti elementarya bayat a dua pulo ket tallo iti Junior High School.
Iti mensahe ni Vice Mayor Faustino Olowan, kinunana a karaman dagiti balud kadagiti inkari ni President Ferdinand Marcos Jr a saan a mabaybay-an.
Ginuyogoy pay ti bise mayor dagiti balud nga itultuloyda ti panagadalda tapno adda latta ti napintas a masakbayanda nu rumwarda iti pagbaludan.
Sigun met iti singkwentay sais anyos a balud manipud iti Baguio City Male Dormitory, gapu iti kinasukirna idi kaubingna ket saanna a naituloy a nag-eskwela.
Pinagyamananna ti programa ti gobyerno gapu ta naipaayan daytoy ken dagiti kakadwana a balud ti oportunidad a makaadal.
