Pimmusay ti tallo pulo ket dua nga indibidual ken nasurok walo pulo a dadduma pay ti nadangran gapu iti dua a ballistic missiles nga impatayab ti Russia iti amianan a siudad ti Ukraine idi kalman.
Kinondenar ni President Volodymyr Zelenskiy ti panagatake—a maysa kadagiti makapapatay a panangraut iti Ukriane iti agdama a tawen—ken kiniddawna ti reaksion ti dadduma a pagilian kontra iti Moscow, Russia.
Iti video nga imbinglay ni Zelenskiy iti social media, maimatangan dagiti bangkay a nagwaras iti aglawlaw, nadadael a bus ken nauram a kotse iti tengnga ti kalsada ti siudad.
Kinunana a dagiti laeng manangallilaw ti mabalin nga agaramid ti nasao a banag, ken nairana pay iti aldaw nga agturong dagiti tattao iti simbaan kas pananglagip ti Palm Sunday, wenno ti iseserrek ni Hesu Kristo iti Jerusalem.
Sigun kenni Interior minister Klymenko, dagiti biktima ket adda iti kalsada, adda iti uneg dagiti lugan, public transport ken pasdek idi napasamak ti panagatake.
Sigun met iti chief of staff ni Zelenskiy a ni Andriy Yermak, ti missiles ket naglaon ti “cluster munitions.”
Iti agdama, awan pay ti komento dagiti otoridad idiay Russia.
