BAGUIO CITY – Inwaragawag ti lokal a gobyerno ti Baguio City nga agiwaras daytoy iti 33,000 a sako ti bagas kadagiti nakukurapay ken vulnerable sectors iti siudad mangrugi inton Mayo ita a tawen.
Sigun iti pablaak ti Baguio City Public Information Office, kinuna ni Mayor Benjamin Magalong a paset daytoy ti rice program ti nasyonal a gobyerno nu sadino naipaayan iti pundo dagiti lokal a gobyerno tapno makagatang iti suplay a maipaay kadagiti indigent residents.
Mapili dagiti benepisyaryo babaen iti listaan nga isagana ti City Social Welfare and Development Office (CSWDO).
Iti agdama, makikikoordinar ti CSWDO kadagiti opisyales ti 128 a barangay iti siudad tapno makompleto ti listaan dagiti kwalipikado a benepisyaryo bayat nga agtultuloy a marikrikna ti epekto ti krisis iti petrolyo.
Immunan a nakaala ti siudad iti agarup P56 million a pundo manipud iti Local Government Support Fund (LGSF) ti nasyonal a gobyerno a maaramat para iti implementasyon ti rice distribution program ti siudad.
Sigun kenni Mayor Magalong, daytoy ti umuna a gundaway nga agnumar dagiti lokal a gobyerno iti rice support program ti nasyonal a gobyerno a mangtulong kadagiti nakukurapay nga apektado iti agtultuloy a ngumatngato a presyo ti petrolyo.
Impetteng ti Mayor a napateg ti nadalus a listaan dagiti benepisyaryo tapno masiguro a dagiti maikari ti maipaayan iti kaskenan a tulong.
Iti inisyal a report, puntirya ti lokal a gobyerno nga iwarasan iti bagas ti nasurok 7,000 nga indigent families iti umuna a paset ti rice distribution ngem mabalin pay nga agbaliw daytoy depende iti assessment nga ipatungpal ti CSWDO kadwada dagiti barangay.
