BAGUIO CITY – Nakemmeg ti 35 a wanted person iti rehiyon Cordillera kasaruno dagiti operasyon nga impatungpal dagiti otoridad manipod Mayo 8 agingga 14.
Maibasar iti report ti Regional Investigation and Detective Management Division (RIDMD), nailista ti Baguio City Police Office ti kangatuan a bilang ti naarestar a dumanon iti 20, sarsarunuen ti Benguet PPO a 11, ken Abra PPO nga uppat
Malaksid iti dayta, karaman kadagiti naarestar dagiti innem a Most Wanted Persons a pakairamanan ti tallo a wanted person iti Provincial Level, dua iti Municipal Level, ken maysa iti Station Level.
Iti provincial level, nakemmeg ni Conrado Gunaden a nailista kas No. 2 Most Wanted Person gapu iti kasona a Statutory Rape; Gilbert Ordonio a nailista kas No. 8 Most Wanted Person ken Edison Wabe a nailista kas No. 9 Most Wanted Person gapu iti kaso dagitoy a panagrames.
Iti met Municipal Level, nakemmeg ni Lopez Tayaotao ken Avon Eve Ilagan a bin-ig a nailista kas No. 1 Most Wanted Person gapu iti panaglabsingda iti Republic Act 9262 wenno Anti-Violence Against Women and Their Children Act of 2004 ken Republic Act 7610 wenno “Special Protection of Children Against Abuse, Exploitation and Discrimination Act.”
Kabayatanna, iti Station Level ket nakemmeg ni Aljon Agustin a nailista kas No. 8 Most Wanted Person gapu iti kaso daytoy a panagtakaw.
