BAGUIO CITY – Agtaltalinaed paylaeng iti pagtaengan dagiti kabagian wenno gagayyemda dagiti 38 a pamilya a bukbuklen ti 168 nga indibidual a pimmanaw iti pagtaenganda sadiay Mong-ol, Maguyepyep, Sallapadan, Abra kalpasan a rinaut dagiti rebelde a New People’s Army ti kampo ti CAFGU sadiay idi napalabas a Huwebes, August 15 a nagresulta iti ipupusay ti dua a militiamen.
Naibasar daytoy iti report ti Abra Disaster Response Operations Monitoring and Information Center.
Sigun iti nasao nga opisina, pakabuklan a 247 a pamilya wenno 920 nga indibidual ti agtaltalinaed nga apektado iti armado a susik sadiay Abra.
Kinunada a maiwanwanawan dagiti 38 a displaced families para iti kaskenan a tulong babaen iti Department of Social Welfare and Development.
Itudtudo dagiti residente sadiay ti managan Mando Eduarte alias Commander Trio kas lider dagiti rimmaut ngem pinaglibakan daytoy ti nagpabigbigv a panakangiwat ti Agustin Begnalen Command dagiti rebelde sadiay Abra.
Mamati pay dagiti residente sadiay Sallapadan nga inaramid dagiti rebelde ti panagraut tapnu mapabutngan wenno mabutbuteng dagiti umili a nangsuportar iti resolusyon a nangideklara kadagiti rebelde kas ‘persona non grata’ iti munisipyoda. (-PROCOR, Bombo Florence Paytocan)
