BAGUIO CITY – Nabigbig ni Cadet 1CL Jahziel Gumapac Tandoc manipod Ampasit, Wangal, La Trinidad, Benguet kas third placer iti PMA MABALASIK Class of 2019.
Iti panakiyuman ti Bombo Radyo kenkuana, kinunana nga inaramidna ti amin a kabaelanna tapnu agtalinaed iti listaan dagiti academic honors malaksid iti dadduma pay nga aktibidadda iti uneg ti akademya.
Imbinglayna a nagbalin a kangrunaan nga inpirasyonna ti ina-una a kabsatna a nagturpos met laeng iti Philippine Military Academy (PMA) idi napalabas a tawen.
Kinunana a saanna a pinanunot a summuko iti panagadalna sadiay PMA gaputa pampanunutenna ti balligi ti kabsatna nga adda itan iti serbisyo iti Armed Forces of the Phillipines (AFP).
Innayonna nga inarapaapna met nga agserbi iti Philippine Army nga ibilbilangna a kapintasan a sanga ti AFP gaputa ad-ado ti gundawayda a makisarita iti publiko.
Kabayatanna, tinagiragsak met ti amana a ni Teodolo Tandoc ti panagbalinna nga achiever iti uppat a tawenna iti akademya.
Kinunana a kas naggannak ket sinuportaranda ti arapaap ti anakna nga agserbi iti armada babaen iti panagadalda iti PMA.
Innayonna a dagiti dua nga agkabsat ti nangragpat iti immuna met laeng a tarigagayna agbalin a soldado kasukat ti namidua a daras a panakapaayna a makastrek iti akademya.
