Posible a mapilaan ti reklamo a kriminal dagiti uppat a kadete ti Philippine Military Academy (PMA) gapu iti panaglabsingda iti Republic Act 11053 wenno Anti-Hazing Act.
Maibasar iti report manipod ti Baguio City Police Office, mapapati a dinangran dagiti uppat a suspek ni 4th class cadet Mauee Bumagat Maraggun, a nangpilit kenkuana a mangaramid ti nainget nga ehersisio agingga nga ag-collapse daytoy.
Dagos a naiturongni Maraggun iti ospital ti V. Luna Medical Center idiay Quezon City sakbay a naisubli iti PMA Hospital Station iti Fort del Pilar.
Nairuar daytoy manipod iti ospital idi Hunio 30.
Kinuna ti biktima a dandani makabulan a napasamak ti mapapati a maltreatment – manipud Sept. 2 agingga Sept. 29, 2024 – iti uneg ti PMA barracks.
Kinuna ni Maraggun kadagiti pulis a napasamak ti panagrigrigatna tunggal adda gundaway dagiti suspek.
Iti agdama, isagsaganan ti kadete dagiti dokumento iti panangipilana ti pormal a reklamo kontra iti upperclassmen daytoy.
Para met iti benneg ti Armed Forces of the Philippines, imbestigaranda ti nasao nga insidente ken saanda nga ipalubos a saan a madusa dagiti nangaramid nu mapaneknekan daytoy a pudno.
