![](https://img.bomboradyo.com/baguio/2020/12/fake-documents-quarantine-checkpoint.jpg)
BAGUIO CITY – Natiliw ti uppat nga indibidual gapu iti panagaramatda kadagiti peke a dokumento tapnu laeng makastrekda ditoy Baguio City idi kanikadua.
Nabigbig dagitoy a da Jeric Dave Ticobay, 35-anyos; Marlyn Camora, 51-anyos; Fajad Dimasangca, 20-anyos ken Saidalyn Camora, 19-anyos ken bin-ig dagitoy a residente ti Baguio City.
Maibasar iti report ti Baguio City Police Office-Station 9, pinara dagiti pulis a mangimanmando iti quarantine checkpoint ti nagluganan dagiti uppat, no sadino, addaan daytoy ti plaka nga A61339 tapno sukimaten dagiti travel documents dagitoy.
Impakita dagiti uppat dagiti dokumento dagitoy ken impasidong dagiti pulis iti beripikasyon dagiti nasao a dokumento ngem sadiay a naduktalan a peke dagitoy.
Naduktalan metlaeng a nagbayad dagiti uppat iti P500 para iti panakaiproseso dagiti nasao a dokumento babaen iti maysa a lalaki nga inrekomendar ti managan Mary Grace Hornacion.
Gapu iti daytoy, naiturong dagiti uppat iti istasyon ti pulisya para iti panakaiprosesoda ken iti panakaipasidongda iti swab test.
Naipila metten ti kaskenan a kaso kontra kadagitoy.