BAGUIO CITY – Pakabuklan a 4,820 nga indibidual ti nabakunaan iti tallo nga aldaw a vaccination activity nga insayangkat ti Department of Tourism (DOT) -Cordillera, Baguio Tourism Council ken Baguio City Government a nairanta para kadagiti trabahador iti industriya ti turismo.
Amin dagitoy ket nakaawat ti first dose ti COVID-19.
Maibasar iti datus ti DOT-Cordillera, agarup 4,000 ti bilang dagiti tourism workers iti Baguio ken bukbuklen dagitoy dagiti agtatrabaho kadagiti hotels, restaurants, homestay accommodations, travel and tour agencies ken dadduma a tourism-related establishments.
Nairaman met iti nasao a panagbakuna dagiti kameng ti media, dagiti entertainers, artists, pony boys ken transport/rental drivers.
Sigun met kenni Tourism Secretary Bernadette Romulo-Puyat, napateg ti panagbakuna iti panagrekober ti industriya ti turismo ken iti panakaipasigurado ti empleyo ken livelihood opportunities iti tourism sector.
Inyunay-unayna a napateg nga iti panagleppas ti nasao nga aktibidad ket amin dagiti tourism workers iti siudad ti nabakunaan gaputa kasapulan met a protektado dagiti taga-Baguio no bilang agawat ti siudad kadagiti fully-vaccinated a turista.
