KUWAIT- Pimmusay dagiti uppat a pulo ket siyam nga indibidual iti napasamak nga uram iti maysa a pasdek wenno housing workers iti siudad iti Mangaf idiay southern Kuwait ita nga aldaw.

Maibasar iti report, napasamak ti uram gapu iti panaglabsing ti agtagikua iti nasao a pasdek iti pagannurutan wenno code violations.

Pinasingkedan ni Interior Minister Sheikh Fahad Al-Yousuf Al-Sabah ti toll ken imbilinna ti pannakaarestar ti agtagikua iti pasdek bayat ti panagbisitana iti nasao a lugar.

Kinunana kasapulan ti naan-anay a pannakaadal ti isyu iti labor overcrowding bayat nga impasiguradona ti imbestigasyon no ania pay dagiti violations iti daytoy.

Kabayatanna, impetteng ni Col. Sayed Hassan al-Mousawi, dadaulo ti firefighters’ Accident Investigation Department a dinosdosena ti nadangran iti daytoy bayat a ngimmato pay ti pinal a bilang dagiti pimmusay.

Iti agdama, manarimaan paylaeng ti imbestigasyon mainaig iti daytoy.//Rose