Nasarakan idi kalman ti agsapa iti kabaybayan ti Davao Region ti lima a bagi dagiti mapapati a crew members ken pasahero iti mapukpukaw a recreational boat nga MBCA Amejara.
Sigun kenni Coast Guard District Southeastern Mindanao Chief Cmdre. Philipps Soria,impakaammo kadakuada ti maysa a fishing company ti nasarakanda nga uppat a tumtumpaw a bagi pasado alas otso ti agsapa idi kalman.
Kasaruno dayta, nasarakan manen ti maysa pay a bagi pasado alas onse ti agsapa iti kapada nga aldaw.
Sigun iti spokesperson iti Philippine Coast Guard(PCG), ti mapukpukaw nga MBCA Amejara ket naglaon it 16 nga indibidwal pakairamanan dagiti crew members.
Naglayag ti nasao a bangka manipod Barangay Sta. Ana, Davao City idi January 17 ken idiay General Generoso, Davao Oriental ti naituding a destinasyon daytoy a nadanonna koma idi January 19.
Nupay kasta, patien dagiti otoridad a nakapasar iti napipigsa nga angin ken dadakkel a dalluyon ti nasao a bangka a mabalin a nakaitunda iti panakadadael ti makina ken ti panakapukawna.
Manipod iti 16 a pakabuklan a bilang dagiti linaon ti nasao a bangka, maysa a crew member ti nareskyu iti kabaybayan a paset ti Sarangani sumagmamano nga oras kalpasan a naipadamag a mapukpukaw ti MBCA Amejara.
Kabayatanna, kinuna ti PCG nga agtultuloy ti search and rescue operation para iti panakasarak dagiti mapukpukaw a daduma pay.
