BAGUIO CITY – Awananen iti biag idi nasarakan ti maysa nga ubing a naiyanod iti napegged nga ayos ti danum ti Saltan River sadiay Talalang Proper, Barangay Talalang, Balbalan, Kalinga idi kanikadua.
Nabigbig ti biktima a ni Ahab Khan Daway, 5-anyos, ken residente iti nasao a lugar.
Segun iti pulisya, nangala iti nateng ni Diana Gooban Daway ken imbatina ti apokona nga agayayayam.
Iti panagsublina ket awanen ti apona isut gapuna a nagdamag daytoy kadagiti kaay-ayam ti biktima ngem saanda met laeng nga ammo nu ayan daytoy.
Gapu iti daytoy ket impakaammona iti asawana ti napasamak agramanen kadagiti kaaruba dagitoy.
Iti naipatungpal a search operations ket nasarakan ti kanawan a tsinelas ti biktima ken ti ay-ayam daytoy iti igid ti karayan isut gapuna nga iningetanda pay ti search and rescue operations.
Nupay kasta, nasarakan laengen ti bangkay ti biktima a nakaipit ti ulona iti dua a dadakkel a bato.
Mapapati a napukaw ti balanse ti biktima bayat ti kaaddana iti igid ti karayan sakbay daytoy a natinnag ken naiyanod iti napegges nga ayos ti karayan.
