BAGUIO CITY – Nakemmeg ti lima nga indibidual sadiay Abra kalpasan a nagpositibo ti search warrants a nagsasaruno nga inyemplementar dagiti otoridad kontra kadagitoy gapu iti panaglabsingda iti RA 10591 wenno Comprehensive Firearms and Ammunition Regulation Act.
Nakemmeg sadiay Talogtog, Dolores, Abra da Ruben Ariota, Romar Reyes ken Juliemar Ariota.
Nakumpiskar kadakuada ti maysa a caliber 45 pistol, maysa a colt, dua a magazine assembly para iti caliber 45 ken 24 a bala ti caliber 45, 15 a bala ti caliber 45 ken maysa nga inside holster.
Simmaruno a nakemmeg sadiay Supiil, San Juan, Abra ni Alvin Barbosa Timbreza kalpasan a nakumpiskar iti pagtaenganna ti saggaysa a caliber 45 pistol, shooter, chamber ken magazine para iti caliber a naglaon ti 5 a bala.
Naudi a nakemmeg sadiay Salideng, Saccaang, Sallapadan, Abra ni Artemio Blanza Ballera.
Nakumpiskar iti pagtaenganna ti maysa a homemade gauge 12 shot gun, maysa a homemade caliber 22, dua a bala ti gauge 12 shot gun ken dua a bala ti caliber 22.
