BAGUIO CITY – Natalimudaw ti innem nga estudyante ti Benguet National High School kabayatan ti panakaisayangkat ti Second Quarter National Simultaneous Earthquake Drill sadiay idi kalman.
Sigun kenni Evangeline Malag, DRRM Coordinator ti DepEd-Cordillera, dagus a naiturong iti pagagasan dagiti uppat nupay addadan iti natalged a kasasaad.
Kinunana a nagserbi kas pilot area ti Benguet High gaputa nalawa ti aglawlaw daytoy para iti tallo a nabigbig nga evacuation areas.
Innayonna a sakbay ti drill idi agsapa ket adda pay ti naisayangkat a dry run tapnu saan a maklaat dagiti estudyante ken naisayangkat ti pudpudno a drill kalpasan ti recess dagitoy.
Pinasetan ti 4,000 nga estudyante ti Benguet High ti nasao a drill ken nakipaset met ti nasurok 300 nga estudyante ti SPED Learning Center, nasurok 300 nga estudyante ti Cordillera Regional Science High School malaksid pay kadagiti empleyado ti DepEd-Cordillera, CSC-Benguet ken Benguet Division Office.
Nagserbi met nga umpires dagiti 65 a pulis ken reservists, pakairamanan ti Red Cross ken ti Cordillera RDRRMC iti panakibinnadang ti provincial government ti Benguet ken municipal government ti La Trinidad.
Nangisayangkat pay iti kapada a drill dagiti pagadalan sadiay Apayao, Kalinga ken Abra.
Mapattapatta a ginasgasut a ribo nga estudyante iti rehion Cordillera ti nakipaset iti nasao nga earthquake drill idi agsapa.
Challenges
Nagbalin a karit ti sasaaden ti panawen iti panakaisayangkat ti nasao nga earthquake drill.
Sigun kenni Franzes Ivy Carasi, information officer ti Office of the Civil Defense-Cordillera, ti napitak nga aglawlaw sadiay ket kapada ti sitwasyon ti rehion tunggal panagtutudo.
Nailanad met iti post-evaluation assessment nga adu dagiti agkatkatawa nga estudyante, adu dagiti saan a nakipaset kadagiti empleyado nga adda iti uneg ti karinderya ken kurang dagiti rescue equipment kas iti ambulasiya ken dagiti naimuntar a signages.
Nagserbi met nga ‘strength’ ti panaka-ammo dagiti estudyante iti napanan dagtioy nga evacuation area.