BAGUIO CITY – Kanayunan a pito a business establishments ditoy siudad ti Baguio ti naduktalan nga agilaklako kadagiti nangingina a face shields no idilig iti naituding a suggested retail price (SRP) ti face shield a P26-P50.
Resulta daytoy ti agtultuloy nga inspeksion nga insaysayangkat dagiti nagtipon a personnel ti Department of Health-Cordillera, Department of Trade and Industry-Cordillera ken Permits and Licensing Division ti City Mayor’s Office.
Maibasar iti report, naipaayan iti letters of inquiry dagiti nasao nga establishimento no sadino nasken nga agpalawag dagitoy no apay a nangatngato no iti SRP ti presyo ti lakoda a face shields.
Maipalagip a dumanon iti 51 manipud iti 130 a business establishments ditoy siudad ti immunan a naipaayan iti surat kalpasan a naglabsing dagitoy iti nasao a pagannurutan ti gobierno.
Immuna metten nga imbilin ni Baguio City Mayor Benjamin Magalong ti kampanya kontra kadagiti pagtagilakuan a manggungundaway iti nangato a pagkasapulan ita iti face shield.
