BAGUIO CITY – Maipaspasidongen iti court-martial dagiti pito a kadete a suspek iti panakaparparigat daydi Cadet Fourth Class Darwin Dormitorio a nagresulta iti ipupusayna iti uneg mismo ti Philippine Military Academy (PMA) idi September 18, 2019.
Iti panakiyuman ti Bombo Radyo iti panakangiwat ti PMA a ni Capt. Cheryl Tindog, kinunana a nabayagen a nalpas ti imbestigasyon iti lebel ti akademya isut gapuna nga impasada ti resulta iti national headquarters ti Armed Forces of the Philippines (AFP).
Dinakamatna a naiyakar metten iti kustodiya ti national headquarters ti AFP dagiti pito a kadete para iti panakaipasidong dagitoy iti general court-martial pakairamanan dagiti dadduma pay nga opisyales iti PMA nga addaan sungsungbatan iti insidente.
Maipasidong dagiti pito iti court-martial gapu iti naipila kadagitoy a kaso nga administratibo, partikular ti panaglabsing iti Articles of War 96 wenno conduct unbecoming an officer and a gentleman nangruna ta dagitoy ket naibilangen a miembro ti militar.
Innayon ni Capt. Tindog nga ur-urayenda met ti resulta ti nasao a judicial proceeding a kagiddan ti panangtingiting ti civilian court kadagiti kaso a kriminal nga impila ti Pamilya Dormitorio kontra kadagiti nasao a kadete.
Immunan a nabigbig dagiti pito a da Cadet 3rd Class Felix Lumbag Jr., Cadet 3rd Class Shalimar Imperial, Cadet 1st Class Axl Rey Sanopao, Cadet 3rd Class John Vincent Manalo, Cadet 2nd Class Christian Zacarias, Cadet 3rd Class Rey David John Volante ken Cadet 3rd Class Julius Carlo Tadena.
