BAGUIO CITY – Simmuko iti gobyerno ti pito a kameng ti rebelde a New People’s Army (NPA) nga addaan operasyon sadiay Mountain Province.
Naiparang dagitoy iti naisayangkat a mass surrender ceremony iti headquarters ti Mountain Province Police Provincial Office (PPO).
Sigun kenni PCol. Clarence Casillo, provincial director ti Mountain Province PPO, ti panagsuko dagiti nasao a rebelde ket bunga ti Retooled Community Support Program ti Mountain Province Provincial Task Force – End Local Communist Armed Conflict.
Indauluan ni Mountain Province Governor’s Office Executive Assistant Winston Calde ti oath of allegiance dagiti rebel returnee a sinaruno ti panagpirma dagitoy iti oath of allegiance.
Insuko metlaeng dagiti sigud a rebelde ti innem a paltog.
Sigun kenni PCol. Casillo, maipasidong dagiti sigud a rebelde iti profiling para iti panagnumar dagitoy iti Enhanced – Comprehensive Local Integration Program ti gobyerno.
