BAGUIO CITY – Sumangsango iti kaso a pammapatay ti maysa a lalaki kalpasan a binagbagsol ken pinapatay daytoy ti mismo a kabsatna sadiay Irisan, siudad ti Baguio idi kanikadua.
Ti suspek ket agtawen iti uppat a pulo ket innem bayat a ti biktima ket agtawen iti limapulo ket walo, agpada a residente iti nadakamat a lugar.
Maibasar iti inisyal nga imbestigasyon dagiti otoridad, agpada a nakainom iti arak dagiti agkabsat idi timmaud ti saan a panagkinaawatan iti nagbaetan dagitoy gapu iti nabayagen a susik dagitoy.
Nagginnaboda iti kalsada agingga a nangala ti biktima iti natangken a banag nga intupakna iti ulo ti suspek, isut gapuna nga inruar met ti suspek ti kutsilyona nga imbagbagsolna iti biktima.
Naitaray ti biktima iti ospital ngem naideklara a dead on arrival kalpasan a nagsagrap iti dua a bagol, partikular iti tiyan ken barukong daytoy.
Simmuko met iti pulisya ti suspek a naglak-am iti dunor iti muging daytoy.
