BAGUIO CITY-Naidataganen iti kaso iti National Bureau of Investigation (NBI) – Cagayan ti maysa kadagiti cultivator wenno agimulmula iti marijuana sadiay Tinglayan, Kalinga nga immunan a nangipatungpalan dagiti otoridad iti eradication idi napalabas a lawas.
Ti suspek a saan nga innaganan ti NBI ket sumangsango iti kaso a panaglabsing iti Comprehensive Dangerous Drugs Act of 2002.
Nakemmeg daytoy babaen iti tulong ti maysa a residente a nangbigbig iti nasao a suspek.
Segun kenni Hector Geologo, direktor ti NBI-Cagayan, mapapati a miembro ti maysa a tribu dagiti agimulmula iti marijuana ken protprotektaranda ti dadduma pay a suspek.
Inaklonna met nga adda pay dagiti plantasyon a saanda a nadanon gapu iti kinaadayo dagiti lugar sadiay.
Maipalagip nga idi napalabas a lawas ket dinadael dagiti otoridad dagiti mula a marijuana sadiay Kalinga nga aggatad iti agarup P11-M.
