BAGUIO CITY – Adu latta ti agrekreklamo iti nabuntog a patrabaho iti kalsada sadiay Purok 20, San Carlos Heights ditoy siudad ti Baguio, partikular iti sango ti pagadalan ti elementarya a pasang-at iti Police Village.
Maibasar kadagiti reklamo a naawat ti Bombo Radyo ket nabuntog la unay ti patrabaho a mangituntunda iti nailet a taray ti trapiko.
Malaksid iti daytoy ket delikado metlaeng kadagiti ubbing a dumalan sadiay gaputa nailet ti kalsada.
Kabayatanna, iti panagturong ti Bombo Radyo Newsteam iti nasao a lugar ket kinuna ti maysa kadagiti trabahador ti nasao a patrabaho a ni Mr. Jovi Irso nga awan ti mabalinan dagitoy gaputa nasken a ni Engr. Anton Na-oy ti mangsungbat kadagiti nasao a reklamo.
Nupay kasta, kinunana nga ada met ti flagmen dagitoy nga agbambantay agingga iti alas otso ti rabii a sublaten met dagiti barangay tanods.
Kinunana pay a nagudwa metlaeng ti patrabaho nga araramiden dagitoy gaputa patrabaho metlaeng ni Enr. Na-oy ti 50 meters a kalsada paturong sadiay Sariling Sikap, San Carlos Heights.
