BAGUIO CITY – Im-imbestigaran paylaeng dagiti pulis ti motibo iti panakabagbagsol ti mayor ti Paracelis, Mt. Province sadiay Santiago City, Isabela idi malem kalman.
Maibasar iti report ti Bombo Radyo Cauayan, tallo nga anggulo ti kitkitaen ti Santiago City Police Office iti panakabagbagsol ni Paracelis Mayor Avelino Amangyen, 52-anyos.
Kangrunaan a kitkitaen dagiti pulis a motibo ket robbery-hold-up, personal a susik ken pulitika.
Rumrumuar iti inisyal nga imbestigasyon dagiti pulis a nagturong ti mayor, kaduana ti maysa nga inhenyero ken kontraktor iti maysa a bangko sadiay tapnu agpa-encash.
Immuna a na-encash ti dua a cheke ti mayor nga aggatad iti P6,000 isut gapuna a nagpakada daytoy a rumuar tapnu aginana iti luganna.
Bayat ti panaginana ti opisyal iti luganna ket killaat nga inasitgan daytoy ti grupo dagiti lallaki ken mapapati a sadiay a binagbagsolda ti mayor.
Nabaelan ti mayor a limmaban, naglugan iti tricycle ken nagpatulod iti maysa a pagagasan sadiay Santiago City.
Nagsagrap ni Mayor Amangyen iti bagsol iti nagduduma a paset ti bagi daytoy, partikular iti barukong ken siket ngem ita ket addan daytoy iti natalged a kasasaad.
