BAGUIO CITY – Nakemmeg ti maysa a babae gapu iti panagaramatna iti bugos wenno peke a pakabigbigan kabayatan ti panag-loan-na iti dua a telebisyon ken maysa a refregirator ditoy siudad ti Baguio idi kalman.
Nabigbig daytoy a ni Mary Jane Palarca alyas Loreta Flores Herrera, 41-anyos, naasawaan, vendor ken residente ti Fairview, Baguio City bayat a ti nagreklamo kontra kenkuana ket ni Ivan Gabriel Rivera, 27-anyos, Loss Prevention and Investigation Specialist ti maysa a credit company iti lokalidad.
Maibasar iti imbestigasyon, immuna a nagturong ti nasao a babae iti maysa nga appliance store sadiay Session Road ken sadiay a nag-loan wenno nag-utang iti maysa a telebisyon nga aggatad ti P20,000.
Inaramatna ti pasaporte a nakailanadan ti nagan a Loreta Flores Herrera idi nagbayad daytoy ti downpayment kalpasanna ket naalana ti telebisyon.
Nagturong manen daytoy iti maysa nga appliance store sadiay Kilometer 4, Marcos Highway ken nag-loan iti maysa a telebisyon ken maysa a refrigerator nga aggatad amin iti P41,000 ken inaramatna ti voter’s ID daytoy a nakailanadan ti nagan a Mary Jane Palarca.
Nupay kasta, kabayatan ti panakaiproseso ti papeles daytoy iti main office ti nasao nga establihimiento ket naduktalan a maymaysa a tao ti nasao a dua a nagan.
Dagus daytoy a kinemmeg dagiti pulis idi maited kuman kenkuana dagiti ni-loan daytoy idi malem kalman kalpasan a nagpatulong ti kompanya kadagiti pulis.
