BAGUIO CITY – Patibkeren pay ti lokal a gobyerno ti Itogon, Benguet ti pannakaital-o ti organic farming iti masakupan ti munisipyo ita a tawen.
Iti panakiyuman ti Bombo Radyo kenni Mayor Victorio Palangdan, kinunana nga ipangruna ti Itogon – LGU ti agro-forestry tourism program ti munisipio.
Impannakkelna nga amin a barangay iti ili dagitoy ket makikaykaysa iti organic farming.
Kinuna ti mayor a makibinbinnadang met dagiti bumarangay iti umno a panagisina-sina kadagiti basura ken agar-aramid dagitoy iti bukodda a compost pit.
Innayonna a dagiti umili nga awanan iti taltalon ket aktibo iti backyard gardening para iti pannakaitandudo ti organic farming.
Sigun pay kenni Mayor Palangdan, maiyannatop launay ti organic farmic sadiay Itogon gapu ta nalawa ti agricultural land sadiay malaksid laeng kadagiti mining areas.
