BAGUIO CITY- Kiniddaw ni Dr. Celia Flor Brillantes, dadaulo ti Reproductive Health and Wellness Center ti Baguio Health Department ti pannakitinnulong ti pulisya iti pannakamonitor dagiti freelance sex worker ditoy siudad.
Kinunana a babaen iti daytoy ket malapdan ti karkaro a panagraira ti sakit nga HIV/AIDS ditoy lokalidad.
Sigun iti doktora, maibasar iti monitoring dagitoy ket umad-adu dagiti freelance sex worker iti siudad ken kadawyan a masarakan dagitoy kadagiti parke, kadagiti igid dagiti kalsada ken kadagiti sidewalk.
Kinunana a malaksid kadagiti freelance sex worker ket nasken a nainget met laeng a mamonitor dagiti balay-pagraragsakan wenno dagiti bar tapno maipanamnama nga awan ti agnanaig iti uneg dagiti bar.
Impetteng ni Brillantes a dagiti bar ket para laeng iti paglinglingayan ken dagiti entertainer kadagitoy ket saan a nasken a makinaig kadagiti kustomer gapu ta mailabsing daytoy iti pagalagadan.
Mainaig iti daytoy ket kinuna ti opisial a gapu iti panagngato ti kaso ti HIV/AIDS ket irtenganda pay ti kampania kontra iti nasao a sakit tapno mapalagipan met laeng dagiti estudiante iti kolehio a lumiklik iti paid sex.
