BAGUIO CITY – Impanamnama ni City Environment and Parks Management Office (CEPMO) a tarimaanenda dagiti agluplupyas a sewer lines iti Central Business District sakbay a mangrugi dagiti dadakel nga aktibidad iti Panagbenga 2018.
Sigun kenni CEPMO head Cordelia Lacsamana, kangrunaan a dalusanda ti agluplupyas a sewer line iti deppaar ti Harisson Road ken iti Abanao Street a nabayagen nga irekreklamo ti publiko gapu iti bangsit ken rugit a rumrumuar kadagitoy.
Inlawlawagna nga intunda daytoy ti panagbara dagiti timmangken a mantika nga ibelbelleng dagiti nagduduma a food establishments iti sentro ti siudad ti Baguio.
Gapu iti daytoy, kinunana a marigrigatan ita dagiti maintenance crew ti CEPMO a mangdalos ken mangtunaw kadagiti nakabara a mantika kadagiti nasao a sewer lines.
Innayonna a gapu kadagiti iresponsable nga establishimiento ket mangipatungpalda iti surprise inspection tapnu maamuanda no asino dagiti pasible a mangibelbelleng iti “used oil” kadagiti sewer lines.
