BAGUIO CITY–Agsagsagana dagiti taxi operator ken driver ditoy lokalidad para iti pannakaipangato ti plete iti taxi kas maitunos iti pammilin ti Land Transportation Franchising and Regulatory Board (LTFRB).
Iti pannakipatang ti Bombo Radyo-Baguio ken ni James Bolinao, presidente ti DUMPER Philippines-Cordillera Chapter, kinunana a nalpasen ti pannakitaripnong dagiti taxi driver ken operators iti LTFRB.
Kinunana nga iti agdama ket iproproseso dagiti operator ken driver dagiti kaskenan a requirement tapno ma-calibrate ti metro dagiti taxi unit dagitoy.
Sigun ken ni Bolinao, karaman kadagiti requirement ti LTFRB ti panangimuntar dagiti taxi operator iti Global Positioning System (GPS), kasta metten iti dash cam iti uneg ken ruar ti taxi, CCTV camera ken ti wireless fidelity (WiFi).
Inlawlawag ni Bolinao nga apaman a maileppas dagiti kaskenan a requirement ket ma-calibrate ti metro dagiti taxi ken agpatak iti metro ti P35 a flag down rate kalpasan a makataray ti taxi iti 400 a metro.
Kinunana a kalpasan ti 400 a metro ket manayonan iti P13.50 ti flag down iti tunggal kilometro a tarayen ti taxi ken sabali pay ti mainayon a P2 iti tunggal maysa a minuto para iti running time ti taxi.
Dinakamat ni Bolinao nga umno laeng ti pannakaipangato ti plete iti taxi gapu iti agtultuloy a panagngato ti presio dagiti produkto a petrolio.
