BAGUIO CITY–Pimmusay ti maysa a lalaki kalpasan a napaltogan daytoy iti sango ti maysa a bar and restaurant iti paset ti Trading Post sadiay Kilometer 5, Pico, La Trinidad, Benguet idi rabii.
Nupay kasta, saan pay a nabigbig ti nasao a lalaki a nakasuot iti maong a pantalon, puraw a sando, nangisit a leather jacket ken nalabaga a kallugong.
Addaan pay daytoy iti tattoo nga scorpion iti kanawan nga ima, tattoo nga skeleton nga addaan payak iti baba a paset ti kanawan a takkiag, tattoo a krus, rosas ken marka nga One Love nga addaan kutsilyo ken puso iti baba a paset ti kanawan a takkiag.
Saan met a nabigbig ti nakalibas a dua a suspek a nakasuot iti nangisit a hooded jacket ken kallugong.
Maibasar iti report, nakawaat ti La Trinidad PNP iti tawag seknan iti panakapaltog ti maysa a lalaki iti nasao a lugar ken iti panagrespondeda ket nakitada ti biktima ken intarayda daytoy iti Benguet General Hospital ngem naideklara daytoy a dead on arrival.
Narekober iti biktima ti nasurok P1,300, cellphone charger, maysa a pouch ken maysa a headset bayat a naipaima iti pulisya ti dua a basyo ti bala ti saan pay a nabigbig a kalibre a paltog.
Manarimaan metten ti panangimbestigar dagiti pulis iti nasao a kaso.
